الى هوات الشعر ومتذوقينه

[وادي الضما]

يالله وانا طالبك تغفرلي ذنوبي يا غفور=ارجيك والجا لك وانا سالك واعيد المسأله

لوماتطهرني بعفوك ماتطهرني البحور=جيتك وذنبي قد تعلاّ غاربي يامثقله

أنامن الطين انخلقت أخطي ولانيب معذور=قامت علي الحجّه بدعوة رسلك المرسله

مؤمن بتوراتك وإنجيلك ومؤمن بالزبور=وبسنّة محمد وآيات الكتاب المنزله

لكن خُدعت بزخرف الدنيا وزادتني غرور=أبدت مفاتنها و ورتني من العمر اجمله

طبعاً بما إني بني آدم حصل منّي قصور=واذنبت يا مولاي ذنبٍ بالخفا ما تجهله

أسألك تغفر لي و تستر موقفي يوم النشور=اليا القفت خلقك صحايفهاوهي مستذهله

من يستلمها بالشمال افلس وهو يدعو ثبور=ومن يستلمها باليمين افلح لخير المنزله

واسألك يا ربي تعاونّي على نيل الأجور=أحياحياةٍ مكسبي فيها من البرافضله

واسألك جاهٍ مع هل الدنيا وحظٍ ما يبور=أيضاًوعرفٍ مع هل الحكمه ورزقٍ تكفله

من لا تهيّا له مقامٍ مع طويلين الشبور=يبكي على ماضاع من عمره وخيبات عمله

وان شاب راسه لا ترجّى فيه تجبير الكسور=لا خير في تالي زمانٍ ما تغانمت اوّله


ومانيب ناسي قصةٍ صارت وانا ازور=القبور لازلت افكرفي غرابتها وبالي تشغله

ساعة ظهرلي شايبٍ له حول قرنين محجور=في جوف قبرٍ عن هل الدنيا طواه ويعزله



سلّم وجا صوبي يقول : ابنشدك يللي تزور=عن حالة الدنيا وعن وضع الزمان وعن هله

أنا مضى وقتي ومرّت بي طويلاتالدهور=والباقي بعمري بعيشه بينكم واستكمله

قلت :الزمان اللي يبارينا على خبرك يدور=الوقت نفسه ما تغيّر ماشيٍ في جدوله

أما البشر لا والله الاّ غير من حد الجذور=صار انتقالٍ من يمين الى يسار المنقله

استغرب الشايب من اللي قلت وبليّا شعور=حط اليمين اعلىالشمال وخاطره في اسئله

قال افتني عن حالة الشيبان والشيخ الوقور=أهل الخبر والراي والحكمه وضرب الأمثله

القدوه اصحاب الأمور اللي تطاع بكل شور=اللي يفضّون النزاع ويحكمون المشكله

قلت البعض منهم على ما قلت في وصفك وقور=قدوه ولكن رايهم ما ينفرض في مسأله

الطاعه العميا بقا منها مجاملة الحضور=اللـي تلاقيها مع اوّل فرصـةٍ متنصّله

والبعض لا عبدٍ يخاف الله ولا عبدٍ شكور=لا زهّده شيبه من الدنيا ولا هو جمّله

بهيمةٍ يرجع على منحاه الاوّل ومحصور=في لعب بيلوته وريح زقارته ومعسّله

والبعض الآخر شابت رموشه على درب الفجور=ينقل جوازه للسفر من مزبله لا مزبله

أشيمطٍ زاني قضا عمره بحانات الخمور=والعايله ورعٍ يغرّر به وبنت مهمّله

قال افتني عن حالة الخفرات ربّات الخدور=اللي تصان ببيت عايلها وبابه تقفله

شيهانةٍ تشمخ عفاف وتصقل فروخ الصقور=بين الفريق ببشتها الضافي وتوبٍ تسبله

قلت العذارى في زمنّا ببغاوات الطيور=تقليد هرج وعرض ريشٍ خلفها تستخمله

تلبس عباةٍ ضيّقت حول الردايف والخصور=فضيحةٍ تكشف جسدها من علوّه لاسفله

وموضة شيالٍ تكشف الوجنات والوان الشعور=والمحرم تبدّل بجوالٍ بيدها تحمله

لا فوّحت صفر الدلال ولا عرفت غش القدور=تطبخ لها خدّامةٍ بالعايله متوكله

الأم ما صانت عفاف البنت من عمر الزهور=والأب ديّوثٍ تحكمه حرمةٍ مسترجله

وشلون يتربّى عيال ام التبرّج والسفور=الاّ خنازير دماها بارده ومغفّله

قال:افتني بحال الشباب الصلب صيّاد النمور=الفارس اللي ينطح خصومه بزندٍ يفتله

الوافي الشهم الغيور اللي لعرض الجار سور=البار عند امّه وابوه وعلم ربعه يشغله

قلت :الشباب بوقتنا وجهه مثل بدر البدور=والجسم من زود الرخا ما تنفتل فيه عضله

قصّة شعورٍ صيّرتهم لا إناث ولا ذكور=والثوب راح ولا بقى الاّ عالمٍ متبنطله

ناسٍ ( فلنتينو ) وناسٍ تلبس ( كرستانديور )=صار التنافس بينهم في لبسهم والجنتله

من كان يشرب من قرار البير مشروبه( بيور)=والبل راعيها غدا يشرب حليب ( النستله)

مامنهم اللي قام دون اعراض جيرانه غيور=من قام قالو وشملقّف حضرته وشدخّله

والوالدين حقوقهم ضاعت وعنهم في نفور=ان غاب عنهم لا تذكرهم ولا جاه الوله

بدّا عليهم شلّةٍ تهوى الوطا بين الجحور=لو تعزله عنهم تبي له شان كنّك تقتله

ما راح يوم يشارك ربوعه بحزن ولا سرور=حتى ابن عمّه يعرفه بالوجه واسمه يجهله

بدّل حكاه وضيّع سلومه وحاله في دبور=وان شاف ضيف يخش حتى انّه يفارق منزله

ناظر لي الشايب بعينٍ تجمع السبع البحور=يقول : انا لا يمكن ادخل مجتمعكم واقبله

انتو لكم وقتٍ تصدّع من بلاويه الصخور=ما يقعد الجمّال به ساعه ولو ضاع جمله


شعر :ظافر الحبابي=

[سلطان الحزن]

لاهنت عل هذه الرائعه ياخي وادي الضما

[ابو نواف]

تسلم يابو على

[وادي الضما]

لاهنت عل هذه الرائعه ياخي وادي الضما
سلمت على هذا المرور ياعزيزي

[وادي الضما]

تسلم يابو على
من قال سلم يالغالي وسلم مرورك

[ابوطلال]

الشاعر ظافر الحبابي من الشعراء المعروفين في قحطان وليس بغريباً عليه الجزاله في الشعر فهو بيتها ونعم فيه وصح لسانه قد ابان واوجز